有日一位媽媽帶著住校服嘅女嚟到診所。
媽媽一行埋嚟登記處就好嬲咁同我講：「嗌醫生同我check吓佢係咪做埋啲唔三唔四嘅嘢！」
我：「請問係要check啲咩呀太太？」
媽媽：「佢嗰度見紅呀，仲可以check啲咩呀？梗係睇吓佢係咪做咗嗰啲嘢啦！」
媽媽同個女講：「你好講係同邊個做啦下！你唔講我都會捉到佢㗎！」
係？咁勁？
阿女：「我冇呀，點解你係都唔信我呀？」
媽媽：「點信你呀？你當我冇做過女仔呀？你阿媽我都係女仔嚟㗎」
我：「太太你冷靜啲先，你個女嗰啲會唔會係月經呀？」
媽媽好大聲喝我：「小學五年班月咩經呀？我未嚟過呀？」
可能太耐冇你一時唔記得咗啫…
阿女開始喺度喊：「我都講咗我冇做過，點解你唔信我喎」
我：「而家小朋友普遍都比較早熟嘅，小學已經開始有月經都唔係咩出奇嘅事，不過你覺得真係需要醫生檢查嘅可以照同你登記，咁登記完就等醫生check好冇？我哋唔好咁快自己諗定答案先好冇？」
媽媽：「check呀！check真啲呀！我哋舊時邊有咁細個就嚟m㗎？實係佢做埋啲唔三唔四嘅嘢，我一定會擰甩你個頭㗎！」
成日講舊時，update吓啦！如果係月經嘅話，阿女係咪都可以擰甩你個頭呀？
我：「太太你冷靜啲先，我哋咪講咗等醫生check咗先囉？你俾妹妹嘅證件我登記先呀」
阿女坐埋一邊喊，阿媽繼續火遮眼。
最後睇完醫生，阿女可以準備返去擰甩阿媽個頭。
阿媽出到嚟陰聲細氣問我：「既然冇咩嘢係咪唔駛俾錢可以走啦？」
發夢啦你。
我：「醫生有診症就要收診金啊，你等等呀」
媽媽：「姑娘，可唔可以快啲呀，我喺度多一秒都覺得好難受呀」
咁呀，要醫生認真啲寫個排版啦。
我：「可能你個女仲難受」
媽媽嘴藐藐行開。
Search